١٣‏/٦‏/٢٠٠٧

حريجه

كويتي وو موو فاهم شنو يعني "حريجه" .. شوي قوية

حريجة: هو نوع من أنواع الطاقة و تكون بالمواد الصلبة عادةً .. بس عادي تلاقي حريجة مظيعة و شابة بالماي .. كل شي جايز

الموضوع و مافيه ..

إن بالدعية شبت حريجة في بيت قدييم

و المشكلة إني كنت قريب .. و صورت الحادث

نترككم مع مراسلنا بالدعية


اللي وده يدقق بالصورة الثانية .. قد يكون محضوض و يشوف "ألسنة اللهب"

بايعها، تلفزيون بلوقر، الدعية

١١‏/٦‏/٢٠٠٧

خطتنا الخمسية

بدش بالموضوع على طوول

قاعدين أنا و
q8-eye
نخطط حق مستقبلنا !!

و معانا ورقة و قلم!!

المهم .. [موو الحين فقرة الأسئلة .. نطروا شوي]

و نبي نسوي جذي .. و عقبها جذي .. و نخلص من هالحركة .. و نبدي بالحركة الفلانية ..

و حطينا كل خططنا الإستراتيجية .. و حددنا أهدافنا المرحلية .. و الرؤية الأولية ..

[أووف .. شقاعد أقوول!!]

السالفة و مافيها .. نبي نرووح الشالية :)

قعدنا الصبح ولا الجو .. مثل ما أنتو شايفين .. طلو من دريشة بيتكم و تعرفون و إذا مالك خلق ..

شوف الصور



١٠‏/٦‏/٢٠٠٧

يرجى الإنتباه ...


السلام عليكم ..

أنا عضو جديد في هذا العالم ..

ما أعرف شي ..

فراح أكتب عن أي شي أشووفه ..

و أي شي يقولون لي عنه ...

و أي شي أصوره بمكامرة تلفوني {٢ ميقا بيكسل} ديربالكم منها .. ترى فضيحة هالكاميرا

المهم .. بس كنت أبي أقوول لكم .. إن أنا هني ..

و بس

١٨‏/١‏/٢٠٠٧

ربنااااااااااااا ولك الحمد







وأخيييييييييييرا....خلصت امتحانات
:)



أول ما طلعت من امتحاني طرا علي صوت الحرم (المكي) ليما يقول


ربنااااااااااااااااااااااااااااااااااااا ولك الحمد




آسف
آسف
آسف جداً على القطعة الطويلة والي كان سببها الامتحانات + رحلة الحج




أبدأ برحلة الحج






يقول الرسول -صلى الله عليه وسلم - "الحج عرفه" وفعلا كان الجو الايماني يسود المكان منهم من يدعو منهم من يقرا القرآن و منهم كان ايوزع عصير وبما أني مو رايح مع حملة كنت في وسط هذا الجو


بس ماشالله هالسنه الزحمة (مو طبيعيه) اربع ملايين او نص ويمكن اكثر....اذن المغرب الساعة 6 وبعد عرفه الحججاج ينتقلون الى مزدلفه


وينامون هناك.......لكن الفلم الي صار ان السيارة واقفه بمكانه ساعة كامله بعدين بدت تتحرك السيارات... مع العلم


ان الطريج ياخذ بس 5 الى 10 دقايق اذا كان الشارع فاضي ....صارت الساعة 8 وحنا ما طلعنا من عرفه


صارت 8:30 ....9:00والشارع يمشي شوي شوي....بطلنا الرادو على اذاعة السعودية (الجبال هناك تشوش على ترددات الرادو)


المذيع: ......قبل قليل ارسل اللواء(......) الى سعادة الأمير(......) يهنئه على خروج الحججاج من عرفه بسلام وبحركة السير الانسيابيه الى المزدلفة.....وأشاد سعادته بالتنظيم القائم و الـ


نعم؟؟؟؟ انسيابيه؟؟؟ ضحكنا بطريقه هستيريه على(الاعلام) الدايخ


آخر شي وصلنا حدود المزدلفه الساعة 1 بالليل!!


بعد 7 ساعات بالضبط......(آل انسيابيه آل) بنسبه لنا مو مشكله لان السيارة كلها شباب (ولو اني اصغرهم) لكن المساكين صج هالعيايز والشياب الي بالباصات الي يمنا....منهم الي كانوا ينزلون على دفعات عشان (عزكم الله) يقضون حاجتهم ومنهم الي مايتحمل القعده بالسيارة والي في سكر والي ...والي


كسروا خاطري هذول.....بالصورة الأولى أفريقي نايم على الباب مال الباص(لو أبطل الباب ايطيح بالشارع)حالتهم كسيفه!....والثانيه

صورة 20 واحد قاعدين بدبة (هاف لوري) وواحد منهم نايم وشويه ويطيح......لاتشوفونه وهو يطق روس....الحمدالله عالنعمه

في مزدلفة هندي مسويله (كافيه) يترزق الله

.

.

لكن طول الرحلة كان في شغله مضايقتني حيييييييييييل

!الصخ

انا استغرب من الحجاج(الا من رحم الله) وين حديث "النظافه من الإيمان" وين "إماطة الأذى عن الطريق"؟

قشور البرتقال و الأفندي في كل مكان و الكراتين مقططه والشارع كله جياس زباله وبقع على الارض الله يعلم شنو كل سنه اروح في زباله بالشارع بس هالسنه الوصخ موطبيعي، لي هالدرجه بعض المسلين قذرين؟

الحج كله بصوب و الحملات الأمريكية والبريطانيه بصوب ثاني....يحليلهم ذربين مايدزون و اسم الحمله

easy Hajj :)

ايي صج....عيدكم مبارك :P

أما بالنسبه للامتحانات............لا تعليق

انا مسافر بكره ام الدنيا توصون على شي

في أمان الله

:)

اترككم مع الصور

يبيع العيش في الهوء الطلق


جيس الجمرات2006

٥‏/١٢‏/٢٠٠٦

أحمد سليم


اجتماعي بطبعة يحب الناس و ((السوالف)) معهم...عنده اخبار المنطقة كلها...حَبوب يعرفه الكل ويستأنس بالحديث معه...يداعب الصغير ويتحلطم مع الكبير...يتكلم بالسياسة و الدين و إدارة الأعمال...كما يجيد التكلم بثلاث لغات (عربي وباكستاني و اوردو)...بهي الطلعة و جميل المحيا...اسود العينين وعريض المنكبين...كبير البطن وتحت عينه بقه سوداء من قلة النوم....اسمر البشره واسود الشعر

...ذلك هو

أحمد سليم

حلاق فرع قطعة 1

...المهم

:قبل امس رحت للحلاق (أحمد)وبعد ما قعدت وبدا يقص شعري

.

((أحمد(بلهجه كويتيه جيدة):إنتا سوي حلق مو عند آنا قبل عيد ((عيد الفطر

نعم؟؟ :Q8-eye

أحمد: إنتا أكيد حلق عند واحد لبناني نفر . صه؟

"ملاحظة:انا حلقت حق العيد عند واحد لبناني"

هااا؟؟!! امبلى:Q8-eye

((بعد لحظات من الصمت))

شلون عرفت؟؟:Q8-eye

!!أحمد: هذا لبناني نفر..ما يشيل شعر مني ((فوق الاذن)) بس هدا بنغلاديشي نفر سوي شيل

-------------------------------------

بعدها قعدت اقول بقلبي:يحليله أحمد....ما يطوفه شي حتى الحلاقه صارت فن ولاها مبادئ واساسيات

٢٧‏/١١‏/٢٠٠٦

اذا شفتوه....سلموا عليه


انتبه....أمامك مُدون

اخترت كلمة (انتبه) لاني ادري ان "البلوجرزجيه" مو سهلييييييين و يطيحون على كل شي ......فالواحد لازم (يتسنع) اذا كان وياهم عشان ما يكون عنوان البوست في اليوم الي وراه

^_^

تنبيه!: اذا شفت هذي السيارة في يوم من الايام....وقف صاحبها وسلم عليه وبوسه بوستين ....صدقني راح يستانس

١٧‏/١١‏/٢٠٠٦

جيمس بوند ...الجديد



في رحلة مليئة بالأحداث( الدرامية)...مع ابن عمي الوسيييييم ناصر...كانت من ضمنها حضور عرض لاحد افلام (المخبر السري جيمس بوند)....الفلم (على قولتهم) آكشن والريال ما قصر الصراحة...خلص الفلم وهو ما انجرح!!، مابقى احد ما طقه ،،الدنيا كلها تلاحقه،،والعجيب طلقات المسدس ماتخلص؟؟،،، هذا كله صوب والذكاء والفطه صوب ثاني...تحليلاته غير منطقية بس لازم تطلع صح (المخرج عاوز كده) ...أما التكنلوجيا....يا عيني...((جهاز بحجم حقيبة اليد هو عباره عن غرفة عمليات متنقله...فيها حبوب البندول وأدوية التسمم و حتى الصدمه بالكهربااااء!!!)...طبعا (الشقحة) والنطة من الدور الثاني هذا شي خالصين منه........والتذبح و...و...و...وبالنهاية صاحبنا (جيمس بوند) يفوز على المجرمين وهو يضحك

.

.

السؤال الي يطرح نفسه

ليش جيمس بوند واحد و(ايهزء) مليون؟


جم جيمس بوند نحتاج عشان نحل بلاوينا في العالم العربي؟


جم راح يرتفع (الضغط) عنده اذا قرر انه يحل مشاكلنا؟ وهل بس راح ايشييب راسه ولا ايصلع مره وحد؟



:أنا اتوقع نحتاج ثلاثه

!واحد في الوزارات عشان يمنع (الواسطاااااااااات) ومرة وحده يمر على مجلس الأمة عشان اسقاط القروض

!وثاني بفلسطين يحررها بروحه لان الشعوب العربيه وحكامها الخونه ما يقدرون

! والثالث ايي لنا بر ميناء عبدالله عشان ينصب لنا المخييم للمرة الثالثه

ملاحظة: كُثر هم من يمثلون دور جيمس بوند في الكويت