ليلة 27-تغطية مباشرة

احم احم...بسم لله الرحمن الرحيم...مراسلكم

Q8-eYe

من المسجد الكبير ليلة 27 من رمضان ....الجو رطب نسبيا...نسبةً للزحمة الشديدة اللهم زد وبارك

حيث يصلي حاليا 100ألف مصلي و مصلية في هذي الليله المباركة

((لا تسئلوني شلون صورت!! بغيت اروح فيييها...مع العلم بأن التصوير ممنوع منعاً باتاً))

نبذة مختصرة عن مسجد الدولة الكبير...هو أكبر المساجد الموجودة في الكويت بدأ بنائه في السبعينيات من القرن الماضي....المصلى الداخلي يستوعب 10 آلاف مصلي (امتلئ بالكامل الساعة 11مساءاً) ونظرا لاقبال الناس على الصلاة فيه فرش الفناء الخارجي (الحوش) ثم الساحة الخارجية (الحمراء) ثم الشوارع المجاورة (البورصة والبنوك) ثم وزارة التخطيييط فرشت بالزل للصلاة

صورة من السطح

انا كنت متطوع ومكاني عند البوابة الخشب للمصلى الداخلي الي تطل على حوش المسجد...كان دورنا عند البوابة تنظيم عملية دخول وخروج المصلين والإسعاف وكل شخص يدخل المسجد....من المعروف ان في هذي الليلة بالذات ينترس المسيد مبجر (لحق ما تلحق) ،لكن الغريب في الموضوع .....ان آلاف من المصلين من مختلف الجنسيات (يايين متأخر)مو مقتنعين ان المسيد (اتملئ عالآخر)ومايبي يصلي بره ....تقول حالف ايصلي داخل المصلى .......ويقعد ايناجرك و يرفع صوته ويأذي خلق الله ويسب وتوصل انه يكفرك و يسد الطريج وتطوفه الصلاة وبالنهاية ما يلاقي مكان ويصلي بآخر الدنيا...ودور المتطوعين تهدأة الوضع ومنع دخول المصلين بالكلمة الطيبة وطول البال ...يالغالي ماكو مكان!...بارك الله فيك هذا ممر طوارئ حق المرضى اتمنى ما تصلي فيه!...لو في مكان جان من عيوني ادخلك بس ماكو!...الله ياجرك قصر حسك الناس قاعد ايصلون!...ومن هالنوع من الكلام طبعا في ناس تتجاوب وفي ناس اصلا يايه تسوي مشاكل

(بس حبيت اقول هالكلام لاني حسيت ان المتطوعين مظلومين )

^_^

صورة من السطح-ممر سري

أَم المصلين(أي:صلى بالناس حق الي ما يعرف عربي) (الشيخ /فهد الكندري)في أول أربع ركعات ثم (الشيخ/مشاري العفاسي) من الركعة الخامسة حتى الدعاء

روووعة مشاء الله

.

.

.

حلو انك تشوف 100 ألف مسلم يركعون مع بعض ...يسجدون في نفس اللحظة....يرفعون ايدهم للدعاء مع بعض....وأنهم متفقين كلهم

على كلمة وحد كلمة (آمين) لكن.....في شغلة بطت جبدي
.

.
انا استغربت من أمر

" انه في وقت الدعاء...ليما يقول الشيخ:"اللهم أعز الاسلام والمسلمين

تسمع الناس تقول آآآآآآآآآآآآآآآآآآآآآمين آآآآآآآآمين بصوت عالي جداً

والاغرب من هذا

ان الناس هذي (الى من رحم الله) عملها بعيد عن التقدم والعزة

بعد الصلاة مباشرة (وكالعادة) التزاحم على الطلعة،،،طق مطاقق على مكان النعل مادري شحقه؟،،،بطولة الماي والكلينكسات الي فيها (...) مقطوطه في كل مكان

شلون تيينا العزة وحنا ليما الحين نشوف هالمنظر!؟

مكان الاحذية

لاحول ولاقوة الا بالله

.

.

.

وفي الختام

اللهم أعد علينا رمضان اعواما عديدة ....وأزمنتاً مديدة

قولوا آمين